បន្ទាយមានជ័យ៖ អគ្គីភ័យបានឆាបឆេះឃ្លាំងស្តុកទំនិញមួយកន្លែង នៅវេលាម៉ោង១០ៈ៣៥នាទីយប់ ថ្ងៃព្រហស្បតិ៍ ទី០២ ខែកុម្ភៈ ឆ្នាំ២០២៣ សង្ស័យបង្កពីទុស្សេខ្សែភ្លើង បណ្តាលឱ្យឆាបឆេះឃ្លាំងស្តុកទំនិញ ឃ្លាំងលេខ ១៣០-១៣១-១៣២ ក្នុងផ្សារឥណ្ឌូចិន ក្បែរផ្សាររោងក្លឿ ឃុំខ្លងលឹក ស្រុកអារញ្ញប្រថេត ខេត្តស្រះកែវ ទល់មុខភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។
ប្រភពពីអាជីវករ ផ្សាររោងក្លឿ និងផ្សារឥណ្ឌូចិន បានប្រាប់ថា៖ គេបានឃើញភ្លើងឆេះបានឆាបឆេះយ៉ាងសន្ធោសន្ធៅនៅក្នុងផ្សារ។ ហើយសាក្សីឃើញហេតុការណ៍ខ្លះបានរាយការណ៍ថា មានឃ្លាំងដែលមានម្ចាស់ជាជនជាតិខ្មែរមួយ និងមួយទៀតរបស់ជនជាតិប៉ាគីស្ថាន។
កម្លាំងអាជ្ញាធរមានសមត្ថកិច្ច និងពលរដ្ឋខ្មែរ-ថៃដែលស្នាក់នៅ និងប្រកបរបររកស៊ីនៅក្រុមផ្សារថៃ នាំគ្នាជួយអន្តរាគមន៍ពន្លត់អគ្គីភ័យ ពេលភ្លើងកំពុងឆាបឆេះ។
ក្រុមជួយពន្លត់អគ្គីភ័យបានគ្រប់គ្រងស្ថានការណ៍បានទាំងស្រុង គឺឆេះអស់ចំនួន ២ឃ្លាំង និងមិនអោយរាលដាលឆេះបន្តទៅតូបនិងឃ្លាំងជិតខាងនៅម៉ោងជិត ១២អាធ្រាត្រ។ រហូតមកទល់ព្រឹកថ្ងៃទី០៣ ខែកុម្ភ:នេះ គេនៅមិនទាន់ដឹងពីទំហំនៃខូចខាតឡើយ៕
